Polo río vai e vén. IES de Soutomaior

Este proxecto de dinamización lingüística consiste nun intercambio colaborativo entre dous institutos de secundaria, o IES de Ponte Caldelas e o IES de Soutomaior, que se atopan próximos, e que teñen en común un eixe vertebrador: o río Verdugo, que discorre por ámbolos dous concellos. Contempla investigacións e traballos creativos sobre un tema escollido alternativamente entre os centros educativos. O pasado curso 2021-22 iniciou o proxecto o IES de Ponte Caldelas, cun traballo interdisciplinario sobre as minas de wolframio en Galiza e a súa implicación na II Guerra Mundial, sendo nós os receptores desa investigación, visualizando e traballando co material elaborado  por eles na páxina web do proxecto.

No presente curso seremos nós os que levaremos a cabo unha investigación sobre uns  muíños de río situados no lugar de Daión, no concello de Soutomaior, cuxos resultados serán recollidos nesta web para mostralos ao IES de Ponte Caldelas. 

  O traballo será multidisciplinar, abordando as seguintes temáticas: dende o departamento de Bioloxía estudiarase a flora do lugar, dende o de Economía a relevancia socio-económica que tiveron no seu día os muíños, en Tecnoloxía veremos os mecanismos que os forman e o seu funcionamento, e por último, en Xeografía e Historia farán unha catalogación patrimonial dos mesmos. O profesorado participante no proxecto é o seguinte: Montse Escudero Fernández, Menchu Bussieres Valcarce, Damián Otero Suárez, Dolores Ferro Diz e Gabriel Muñiz Alonso, coordinados por Antonio Ricón Rodríguez dende o Equipo de Dinamización da Lingua Galega.